Dose naanod sa baha sa Talisay

Dose ka tawo ang nangaanod sa dakong baha diha sa kaliguanan sa Laya sa barangay Candulawan sa dakbayan sa Talisay kagahapon sa hapon.

Wala pa matino atol ning pagsulat sa balita kung dunay na-missing sa aksidente apan giila ang mga nangaanod mao sila si Jero Tan,17, taga Sario, Bulacao ning dakbayan, mga batan-ong naila lang sa mga ngalan nga John Paul, Mike ug Marvin nga taga Tugas,Pardo ug sa Cogon Pardo ning dakbayan.

Atol sa pagsulat ning balita wala pa matino kung diin nga tambalanan nadala ang upat.

Lakip sa nangaluwas giilang sila si Ernel Badayos,19, Jun Carlo Marindoque,16, Rith Ernest Sabay,15, Adrian Varquez,19, pulos taga Pardo nadala sa Talisay District hospital apan si Varquez gibalhin sa usa ka pribadong hospital dinhi sa Sugbo sanglit nakainom kini og daghang tubig ug nakaangkon og daghang pangos sa lawas.

Samtang nadala usab sa nagkadaiyang tambalanan sila si Jiboy Gabuya,21, Jinos Cabaluna,21 ug Arnel Cabaluna,15.

Sumala pang Candulawan barangay kapitan Josefina Concial sa pakighinabi sa Banat News kagabii ang mga biktima nangaligo diha sa Laya ug kalit nga gibanlas sa dakong baha gikan sa bukid.

Gikatahong gibadlong pa ang grupo sa konsehal sa barangay nga si Konsehal Nicasio Abandan nga di palahuson sa maong bukal tungod kay dag-om ang langit sa bukid apan giingong wala mopatuo ang grupo, sumala pang Concial.

Diha palang duol sa kaliguanan giingong gibadlong usab kini sa usa ka mag-uumang giilang si Leonito Cabaluna nga dili palahuson tungod gihapon sa dag-om sa bukid.

Dangtan pila ka gutlo kalit nga gibanlas sa baha ang mga batan-on samtang ang uban misuway og tungtong sa dagkong bato apan tungod sa kataas sa tubig naabtan gihapon sila og naanod paubos.

Si Roger Amancia,36, taga Candulawan nga may balay diha sa tampi sa suba usa sa mga miluwas kang Roniy Verbosado,15, mitug-an sa Banat News nga duna pay laing usa nga nagsuot og itom nga t-shirt ang gisuwayan og kab-ot sa iyang maguwang nga si Junior apan tungod sa kakusog ug kalawom sa tubig nabuhian kini.

"Katong usa (nakaitom t-shirt) iya gyud untang luwason pero di naman gyud madala niya kay lawom man ang tubig bug-at man kaayo kay madala man siya(maguwang)," asoy pang Roger.

Tungod sa kangitngit sa lugar ug kusog gihapong tubig wala na makapadayon ang mga opisyales sa barangay sa pagpadayon sa ilang pagpangita kagabii atol sa pagsulat ning balita.