Mayor sa Consolacion midapig sa 'nanagmal' nga pari

Gilabanan ni Consolacion Mayor Avelino Gungob Sr. ang kura paroko sa ilang lungsod, Padre Salvino "Jun" Figues, kinsa gikataho nga nanagmal sa iyang sulogoon nga si Christopher Canonigo.

Matud pa ni Gungob nga dili makatarunganon ang maong pamasangil ug gihimo-himo lang ang estorya aron pagdaut kang Figues.

Ang insidenti nahitabo atol sa kapiyestahan sa patron sa parokya, San Narciso, niadtong Oktobre 29.

Matud pa ni Gungob nga atubangan sa katawhan, nakasab-an ni Figues si Canonigo ug gigunitan ang nawong niini aron paminawon ang iyang sugo human daw sa gibaliwala lang sa sulogoon ang iyang sugo.

Sumala pa ni Gungob nga gipangutana lang ni Figues ang sulogoon kon nganong wala niya tumana ang iyang gimbuhaton matag sugod ug matag human sa Santos nga Misa sama sa pagpahimutang sa mga electric fans ug uban pang kagamitan.

"This was all that really happened and then, all of a sudden, the bloated news in the radio and other media outlets has portrayed that Fr. Jun Figues has already manhandled and mauled the errand boy," nagkanayun si Gungob.

Giklaro ni Gungob nga usa siya sa nakakita sa tinuod nga hitabo ug saksi sa kamalumo og kasingkasing sa pari.

Dugang pa ni Gungob nga atol sa maong adlaw, nagtinapolan lang ang sulogoon hinungdan nga siya nakasab-an sa pari.

Gani nagreklamo usab ang luyoluyong kura paroko ni Figues ug ubang magsisimba sa batasan sa sulogoon.

Sayo niini, ang sulogoon nitaho sa buhatan sa kapolisan sa lungsod sa Consolacion ug namasangil nga gituok siya sa pari human siya nibalibad nga gigamit na sa choir ang electric fan nga ipakuha unta kaniya sa dihang magsugod na ang misa.