Honorarium sa tanod wa budget

Giklaro ni Association of Barangay Council (ABC) President ug Guadalupe barangay captain Eugenio Faelnar nga walay igong pundo pagkakaron ang siyudad sa Sugbo nga gitagana alang sa counterpart nga honorarium nga gihatag sa dakbayan ngadto sa mga tanod sa kabarangayan dinhi sa dakbayan.

Gibutyag ni Faelnar nga kini maoy hinungdan nga ang honorarium sa bulan sa Enero hangtud sa milabay'ng bulan sa Hulyo mao pay gi-asikaso karon sa siyudad aron ma-release na kini sa mosunod nga mga adlaw.

Mokabat sa P9 milyones ang kinatibuk-ang gahin nga gikinahanglan sa siyudad alang sa counterpart nga honorarium sa mga tanod sa kabarangayan.

Ang siyudad sa Sugbo naghatagan og counterpart nga honorarium sa mga tanod niadtong 42 ka mga barangay nga wala makaabot og P1,200 ang gihatag niining honorarium sa mga tanod.

Apan giklaro ni Faelnar nga niadto pang milabay'ng bulan sa Marso nakapasar siya og resolusyon alang niining maong katuyoan apan nalangay kini tungod kay wala kini maatiman ni Mambaling barangay captain Rodulfo Estella nga maoy acting ABC president dihang gipa-ubos sa tulo ka bulan nga preventive suspension si Faelnar sa Sandiganbayan tungod sa gisang-at nga reklamo sa kanhi kawani sa ABC nga si Leah Rondez.

Tungod niini, giasikaso karon ni Faelnar ang pagpasar og resolusyon sa konseho nga maoy usa sa gikinahanglan sa Accounting Office aron ma-release ang maong gahin alang sa honorarium sa mga tanod gikan sa Enero hangtod sa Hulyo.

Samtang ang honorarium gikan sa bulan sa Agosto hangtod sa Disyembre karong tuiga pangitaan pa kini og gahin sa siyudad.

Nasayran nga daghan nang mga tanod sa barangay ang nangreklamo sa grabeng kalangay sa ilang counterpart nga honorarium gikan sa siyudad nga tapal-tapal sa ilang adlaw adlaw nga panginahanglan.