Plete sa mga sakyanan de LPG o bio-fuel minusan

Gitinguha karon ni Konsehal Arsenio Pacaña nga ipatuman ang minus nga pletehan niadtong pampublikong sakyanan nga migamit og alternative source of fuel sama sa Liquefied Petrolium Gas (LPG) o ba kaha bio-fuel.

Kini human miabot sa atensyon sa Committee on Trade Commerce and Industry nga halos gi-doble karon ang kita ug ganansiya sa mga taxi ug PUJ operators og drayber human gi-convert ang mao nilang mga unit gikan sa gasolina ngadto na sa LPG-fed engine.

Dinhi sa Sugbo gibanabanang moabot og 2,000 ka mga taxi unit ang nagpa-convert ug migamit na karon og LPG human sa subsob nga pag-awhag sa gobyerno pag-promote sa 'alternative source of fuel aron kaminus-minusan ang grabeng pagsalig sa Pilipinas ngadto sa mga imported nga produktong petrolyo gikan sa world market nga mahal ra kun itandi sa bio-fuel.

Gawas niini, ang paggamit sa maong mga alternative fuel makaminus usab kini sa polusyon ug ingon man dili kaayu makahatag og kadaut sa kinaiyahan.

Subay sa gipasar nga resolusyon ni Pacaña mihaum ang mao niyang lakang sa kampanya sa Land Transportation Franchising and Regulatory Board (LTFRB) nga nag-awhag sa mga taxi unit nga migamit og bio-fuel pagbutang og sticker sa windshields niini aron paghatag og kasayuran sa publiko.

Kini maoy hinungdan nga giawhag sa konsehal ang LTFRB nga tun-an ang posibleng pagpatuman og mas minus nga pletehan niadtong mga taxi ug PUJ nga migamit og bio-fuel nga mas barato ra kon itandi sa gasolina ug krudo.