Indian misibat sa checkpoint

Indian national gisikop sa mga sakop sa SWAT team sa Lapu-Lapu Police Station atol sa checkpoint sa unang taytayan sa dakbayan sa Lapu-Lapu ug Mandaue sa milabay'ng gabii.

Ang nasikop mao si Jan Jit Singh, kasamtangan nagpuyo sa Bankal, Lapu-Lapu.

Matud pa ni Insp. Junnel Caadlawon, ang team leader sa checkpoint nga gihimo ubos sa taytayan, ilang gipahunong si Singh apan wala kini mohunong hinuon misutoy kini og padagan sa iyang motorsiklo nga gisakyan.

Gigukod si Singh sa mga sakop sa SWAT team ug sa tantong ginukdanay didto kini masikop sa Patalinghug Avenue, Pajo, Lapu-Lapu.

Sa dihang gipangitaan kini og lisensiya ug rehistro sa motorsiklo nga iyang gimaneho napakyas kini sa pagpresentar niini hinungdan nga kini gisikop ug nabilanggo sa Lapu-Lapu Police detention cell.

Nasuta usab sa kapolisan nga si Singh nakainom kini og bino sa dihang nagmaneho sa maong motorsiklo hinungdan usab sa kahadlok niini ngadto sa mga otoridad.

Kagahapon pormal nang gipasakaan og kasong kalapasan sa Art. 151 ubos sa Revised Penal Code gumikan sa iyang pagsutoy og padagan sa iyang sakyanan bisan pa sa pagpahunong kaniya sa mga otoridad.