2 ka bata naanod sa sapa

Duha ka mga batang giingong mga rugby boys nga namunit og basura ang nangaanod sa kalit nga pagbul-og sa baha diha sa usa ka sapa sa kilid sa University of San Carlos High School for Boys sa dalan General Maxilom Avenue sa barangay Camputhaw ning dakbayan kagahapon sa udto.

Ang usa sa naanod nga 14 anyos taga Tabay Lawom sa Labangon naluwas human nakakapyot sa balili diha na sa sitio San Jose sa Zapatera diin ang grupo ni Zapatera barangay Kapitan Francisco Benedicto maoy nakabangal kaniya.

Samtang naanod palayo mao ang 10 anyos batang lalaki nga una nilang gikabalak-ang gianod ngadto sa dagat apan nasutang dunay miluwas kaniya nga usa ka wala mailhing tiguwang nga miitsa og pisi diha sa taytayan sa Echavez sa Zapatera.

Ang mga sakop sa Mobile Patrol Group mialarma sa tanang kapolisan ug mga barangay ang agian sa maong sapa gikan sa Camputhaw, Parian, T.Padilla, Tejero ug ngadto na sa Pier 3.

Lakip sa mitabang og pangita ang Emergency Rescue Unit Foundation, Philippine Coast Guard Cebu Station ingon man mga residente.

Laing kauban sa mga bata mao ang onse anyos nga batang babayeng taga Carreta kinsa ikmat nga nakabantay sa pagsaka sa tubig dali usab nga nakakatkat sa taytayan.

Wala magkaparehas ang pangangkon sa mga bata tungod kay dunay miingon nga tulo ra sila apan duna say miingon nga upat sila niadtong tungura, apan nasayran gikan kang Benedicto nga unom gyud silang nangatulog sa maong dapit niadtong tungura.

Usa ka Dulce Castro,20 anyos ang miadto sa Zapatera barangay hall ug mitug-an nga naanod usab kauban sa maong mga bata ang iyang 17 anyos nga manghod apan nasayran nga wala gyud kini maapil ug naglaroy-laroy ra diay.

Matud pa sa onse anyos nga batang babaye sa Banat News gikan pa sila namunit og basura maong nangatulog sila sa ilawom sa tulay apan nakamata tungod sa kusog na kaayo ang baha misaka sila apan ang 14 anyos ug 10 anyos nangahagbong sa tubig.

"Apason man ta nako (ang 10 anyos), unya nawagtang man siya, naglisod naman ko og langoy kay suyopon man ko pailawom nikapyot nalang ko sa balili," asoy pa sa 14 anyos sa Banat News.

Matud pang Benedicto mga rugby boys ang maong mga bata ug makadaghan na nilang nadakpan ug gidala sa Community Scout apan makagawas gihapon.

Ang luya na kaayong 10 anyos nga batang lalake diha na makit-i sa ganghaan sa simbahan sa Redemptorist diin maninda ang iyang inahan og sigarilyo samtang gi-turn over ngadto sa Community Scout Center ang 14 ug 11 anyos aron maatiman.