Olango butanga'g sundalo

Ang isla sa Olango, Lapu-Lapu nalakip sa higpit nga pagabantayan sa mga sakop sa kasundalohan atol sa 12th Association of Southeast Asian Nation (Asean) Summit karong Disyembre.

Si Lt. Col. Jefferson Omandam, tigpamaba sa Central Command miingon nga ang isla sa Olango usa lang sa mga dapit sa Sugbo ug silingang mga lalawigan nga butangan og mga sundalo.

Naglakip niini ang Dumaguete, Siquijor, Negros ug Bohol nga ilang gitan-aw nga nagkinahanglan og dugang mga sakop sa kasundalohan nga mopatuman sa kahapsay ug kalinaw.

Gipasabot ni Omandam nga ang maong mga sundalo maoy mahimong blocking force batok sa pundok sa mga dautang elemento nga mosulod sa Sugbo aron sa paghimog kasamok atol Asean Summit.

Sa nasayran nga ang kasundalohan nga sakop sa Marine battalion gikan sa Mindanao, Samar ug uban pang dapit sa nasud nahidangat na dinhi sa Sugbo.

Gidestino na ang pipila niini kanila sa dakbayan sa Lapu-Lapu, amihanan ug habagatang bahin nga kalungsoran sa Sugbo.