5 lalaki, 1 babaye nasikop sa raid

Nagsaulog sa sulod sa bilanggoan sa detention cell sa kapolisan sa dakbayan sa Lapulapu ang lima ka lalaki uban sa usa ka babaye kinsa nadakpan sa gihimong pagpangronda sa kapolisan sa miaging gabii.

Sa duha ka pagpangronda sa sitio Matumo, Pusok ug sitio Humay-Humay, Gun-ob sa maong dakbayan ug nasakmit ang 29 ka paketeng shabu gikan sa unom ka mga suspetsado.

Sa nasayran sa Banat News kang SPO3 Mario Poblete nga lakip sa nadakpan mao si Nilda Sagarino, hingkod ang panuigon sa Humay-Humay, Gun-ob.

Matud pa niya nga si Sagarino ilang nakuhaan og shabu sa sulod sa panimalay dihang ilang gironda base sa search warrant nga giluwatan sa korte.

Dugang nilang nadakpan sila si Rene Loquillano, Noel Dano, Fiel Anthony Pasomala nga pulos nagpuyo sa maong dapit ug ingon man si Justino Ardina nga taga Guba sa dakbayan sa Sugbo.

Si PO1 Jonaske Romero sa kapolisan sa maong dakbayan nga gikahinabi sa Banat News miingon nga nagtingkagol karon ang unom ka dinakpan sa sulod sa bilanggoan.

Dugang pa niya nga si Sagarino ug ang lima ka mga kaubang dinakpan ang ilang pasakaan og kasong kalapasan sa pagpamaligya ug paghupot sa ilegal nga drugas.