Hapon may uban nga dalaga 'palgang patay

Napalgang patay ang usa ka negosyanteng Hapon human nakig-uban sa usa ka 19 anyos nga babayeng tinun-an sa unang tuig sa kolehiyo diha sulod sa giabangan nilang lawak sa usa ka hotel sa dalan Manalili ning dakbayan.

Ang biktima nga gisuwayan og dala sa Chong Hua Hospital giilang si Shigeya Toshio,57, buwag sa asawa, lumad nga taga Tsukimino Yamato Shi Kanagawa-Ken sa nasud sa Japan.

Apan pag-abot sa maong tambalanan gideklarar kining dead on arrival, wala pa matino ang hinungdan sa kamatayon niini.

Mitumaw sa imbestigasyon sa Homicide Section pinanguluhan ni SPO3 Alex Dacua nga dunay kaubang tinun-ang babaye ang biktima diha sa room 402 sa maong hotel. Matud pang Dacua tulo na ka tuig nga uyab ang duha.

Sumala pa sa babaye ngadto sa kapolisan dihang nahigmata siya gikan sa pagkatulog wala na diha ang biktima sa iyang tupad ug dihang iyang gisusi nakit-an niya kini sa kasilyas nga naghigda ug naglisod sa pagginhawa. Gikatahong naligo niadtong tungora ang biktima.

Ang babaye daling miadto sa front desk sa hotel aron pagpangayo og tabang, ang mga kawani na sa maong hotel ang mitawag sa Ermergency Rescue Unit Foundation pinanguluhan ni Raul Quijano ug midala kaniya sa maong tambalanan.

Walay nakitang timailhang gidagmalan ang biktima tungod kay walay nakitang mga samad o ba kaha bun-og ang kapolisan diha sa lawas niini ug wala say nakit-ang kaguliyang sa mga butang sa palibot.

Buot sa mga imbestigador nga ipailawom sa awtopsiya ang patayng lawas niini.