3 patay sa disgrasya atol sa kalag-kalag

Tulo ka mga tawong padulong sa sam-ang sa Mantalongon, Dalaguete namatay human madam-agi og trak de kargang padulong usab sa tabo-tabo sa Maluray sa samang lungsod kagahapon sa buntag.

Si PO2 Reynaldo Amarillento sa Dalaguete Police Station miila sa mga biktima nga mao ang magsuong sila si Roberto Medina, 26 ug Evelyn Medina, 23, ug Thelma Evarola, 22 nga tulo pulos residente sa Maangtod, Dumalan sa samang lungsod.

Ang mga biktima luwan sa usa ka motorsiklong gimaneho ni Roberto dihang nadasmagan sa trak nga gimaneho ni Joselito Elimino, hingkod ang panuigon nga taga Mantalongon.

Sumala pang Amarillento, samtang padulong ang tulo sa sam-ang aron managkot, pag-abot sa kurbadahong dapit sa maong lugar nasugatan ang maong trak.

Tungod sa kakusog sa pagbangga, ang tulo nangalagpot sa sementadong dalan ug nakaangkon og grabeng mga pangos ug bun-og sa kalawasan lakip na ang ilang ulo nga hinungdan sa hinanali nilang kamatayon.

Ang patay'ng lawas sa mga biktima gidala sa St.Williams Homes samtang ang drayber daling miikyas ug gibiyaan ang trak nga dunay mga kargang mga bugas, scramble ug uban pang mga grocery items.

Matud pa sa kapolisan nga wala na mahitsura ang motorsiklong gisakyan sa mga biktima nga gipanag-iya sa usa ka Misael Perez nga taga Mainggit, Toledo.