Si Police Inspector Rolando Ong kinsa maoy officer-in-charge sa Ronda Police Station karon, nagkanayon nga iyang ipresentar kining maong mga misurender ngadto sa mga media karong Biyernes sa alas 9:30 sa buntag didto sulod sa simbahan sa Ronda.
Si Mayor Mariano "Nonie" Blanco misaad usab nga iyang paluyohan ang promosyon nga angayang itunol ngadto kang Ong kinsa sulod sa duha pa lang ka buwang paglingkod niining isip OIC nga hepe sa kapolisan sa lungsod nagpakita na sa iyang dagkong kalamposan.
Hinuon may tulubagon pa si Ong sa pag-ikyas ug pag-eskapo ni Juana Villagonzalo, hingkod, kinsa mipoga dala ang posas niadtong Sabado sa buntag gikan sa prisohan sa lungsod.
Usa sa hinungdan nga mipoga ang maong piniriso mao ang kakuwang og prisohan o selda sa mga babayeng mapriso sa lungsod.
Nasayran sumala sa giasoy ni Ong nga nadakpan nila si Villagonzalo nga namaligyag shabu nianang Biyernes sa hapon, ug tungod kay wa may selda sa mga babaye, diha ra kini sa opisina sa kapolisan palingkodlingkora nga pinosasan.
Apan nianang pagka Sabado sa buntag samtang bisi kaayo ang duha ka guwardiyang polis, ang usa nagtubag sa tawag pinaagi sa radyo gikan sa ilang headquarter sa probinsiya, samtang ang usa ka polis naghikay og pamahaw, kalit nga miikyas si Villagonzalo.
Sa pagkakaron mao kini ang gibantayan sa duha ka mga polis nga iyang giiskapohan didto sa barangay Langin, Ronda, may walo ka kilometro gikan sa Poblacion aro dakpon pagbalik.
Ang ka-live-in partner ni Villagonzalo nga si Dioscoro Albina nakaipsot ug wa hidakpi sa kapolisan.
Nasayran gikan kang Ong nga ang Ronda maoy sentrong palitanan og shabu sa taga Barili, Dumanjug, Alcantara, Moalboal ug Badian.
Si Ong nga naggikan sa Talisay Police Station miingon nga ang supplier og shabu ngadto sa Ronda taga Duljo, Cebu City.