Kauban sa 2 ka tulisan nga miikyas 'sikop

Nadakpan kagahapon sa hapon ang gidudahang kauban sa duha ka napatay nga gipasanginlang mga tulisan sa Mambaling niadtong milabay'ng Domingo sa gabii.

Ang nadakpan giilang si Redentor Omacub,26, taga Lawis, Alaska-Mambaling ning dakbayan silingan sa napatay'ng si Dominic Degamo usa sa mga suspek sa pagtulis sa PUJ nga gikaengkwentro sa mga sakop sa Mobile Patrol Group diha sa Jai-Alai,Mambaling.

Ang Criminal Investigation and Intelligence Branch pinanguluhan ni Supt. Pablo Labra uban sa gibana-banang 50 ka mga polis miadto sa balay nga giabangan ni Omacub.

Si Omacub dunay standing warrant of arrest tungod sa kasong frustrated murder diha sa sala ni RTC Branch 5, Judge Ireneo Lee Gako Jr. nga may piyansang P100,000.

Lakip sa napatay nga kauban ni Degamo mao si Edmer Roman,19, kinsa nakuhaan og kalibre 38 rebolber.

Matud pang Labra, niadtong human sa pagkahitabo nailhan na nila ang kauban sa duha nga si Omacub apan wala kini diha sa ilang panimalay dihang gisusi,kagahapon nasigpatan kini og balik maong gilusad dayon ang operasyon.

Si Omacub sa pakighinabi sa Banat News wala moangkon sa pasangil sanglit wala sila mag-uban sa duha ka napatay niadtong tungora, matud pa niya nga usa siya ka shellcraft worker ug wala malambigit sa pagpanulis.

Gipanghimakak usab niya ang kabahin sa arrest warrant sanglit wala siya'y nahibaw-ang kaso nga gikalambigitan kaniadto.

Ang siyam ka buwang mabdos nga kapuyo sa suspek nga si Ruby Alega nagkanayon nga kalit lang nga nangabot ang mga polis ug diretso og dakop kang Omacub.

"Kuyawan lang ta,gidiretso lang man nila og dakop , kay nisaka naman sila dayon sa taas," asoy pa niini.

Si Labra nagkanayon nga ipatawag nila ang mga biktimang sila si Jurryvie Caragon, Maria Agnes Relles ug Maria Ligaya Omandac aron pag-ila sa suspek.