Traysikad driver giluba

Patay ang usa ka traysikad driver human kini duslaka duha ka higayon diha sa liog sa iyang gikaaway diha sa Ubos Poso, sa Basak-San Nicolas ning dakbayan niadtong milabay'ng gabii.

Wala na matabang ang biktimang si Junjun Mancera,19, human siya kaliti og duslak ni Eddie Tribusio alyas Akak, nga iya rang silingan.

Matud pang PO3 Henry Estoy sa Homicide Section sa pakighinabi sa Banat News nga sayo pa niana, naglalis na ang duha sumala pa sa higala sa biktima nga usa usab ka traysikad driver.

Gikatahong nadunggan sa higala sa biktima nga naglalis ang duha ug naghisgut og bugas apan human niini mibalik lang ang biktima og lingkod diha sa iyang traysikad.

Wala na kini makabantay sa pagduol sa suspek kinsa daling miduslak sa iyang liog duha ka higayon, ang biktima misuway og dagan apan nalimbuwad kini pila ka metros gikan sa iyang bisekleta. Ang suspek dali usab nga miikyas.