Babaye mi-eskapo sa presinto

Nakaeskapo sa presinto sa kapolisan ang usa babaye nga nadakpan sa buy bust operation gumikan sa pagpamaligya og ginadiling drugas sa iyang bana niadtong Biyernes sa Palanas, Ronda pasado alas 3 sa hapon.

Segun sa report sa kapolisan nahitabo ang pag-eskapo niadtong Sabado pasado alas 5 sa buntag sa dihang ang duha ka polis nga on duty dunay gibuhat nga lain.

Ang mi-eskapo mao si Juana Villagonzalo, 28 minyo, nagpuyo sa Palanas.

Si Insp. Rolando Ong nga nahinabi sa Banat News miingon nga wala gyud masulod sa detention cell si Villagonsalo kay wala silay prisohan alang sa mga babaye. "Lisod kaayo diri kay sa mga lalaki ra ang prisohan walay sa mga babaye mao to nga diri lang sa sulod namo gipakatug ang suspek" dugang asoy ni Ong.

Sa sayo pa ang bana ni Villagonzalo nga giingong drug pusher gi buy bust ni PO3 Roger Incipido apan nakaikyas atol sa maong operasyon

Si Villagonzalo nakit-an ni PO2 Incipido nagdala kini og kutsilyo hinungdan nga gidakop apan sa dihang girikisa nakuhaan og usa ka pakete sa gituohang may sulod nga shabu.

Matud ni Insp. Ong si Villagonzalo maoy usa sa walo ka mga lalaki ang ilang nadakpan tungod sa paghupot ug pagbaligya sa ginadiling drugas sa Palanas.-Rey B. Pasaporte BAHA SA MANILA ... Mga residente sa Malabon mi-ubog sa baha mugna sa kusog nga ulan dala ni Bagyong Cimaron (Paeng) nga mipatay na og inahan ug anak, samtang libuan na ang namakwit. Ang bagyo miigo sa kauluhan dili pa lamang dugay.