Construction worker, patay

Usa ka construction worker napalgang patay sulod sa bunk house sa construction site nga gitrabahoan sa dalan Gerardo Ouano, barangay Opao, dakbayan sa Mandaue.

Ang biktima mao si Mauro Resconde, 50 anyos, minyo nga temporaryong nagpuyo sa barangay Labogon sa maong dakbayan.

Sa nasayran sa Banat News kang SPO3 Wilfredo Rodriguez sa kapolisan sa Presinto 5 nga alas 9 pasado sa buntag nga nadiskubrehan ang patay'ng lawas sa biktima.

Maoy nakadiskubre ang mga kauban niini sa trabaho nga sila si Bong Enciso ug Nico Jimenez kinsa misulay unta sa pagpukaw niini.

Gidala ang patay'ng lawas sa biktima sa Saint Ann Funeral Homes sa Ibabao Estancia sa maong dakbayan ug gihimo ang pag-awtopsiya.

Matud pa ni Rodriguez nga si Dr. Gil Macato ang medico legal officer sa National Bureau of Investigation (NBI) maoy naghimo sa otopsy sa patay'ng lawas sa biktima.

Dugang pa niya ilang gipaabot ang resulta sa otopsy alang kon may foul play ba o wala ang kamatayon sa biktima.