Gikan nag-dart gipusil sa Duljo

Patay ang usa ka lalaki kinsa bag-ohay pa gikan nagduwa og dart uban sa iyang mga higala diha sa sitio Punyang sa Duljo-Fatima human kini pusila samtang naglakaw pauli sa ilang panimalay.

Giila ang biktima mao si Raul Cabo,36, taga sitio Huyong-huyong sa Mambaling ning dakbayan kinsa nakaangkon og mga samad pinusilan sa likod agi sa kalibre 45 nga armas.

Wala pa matino sa Homicide Section kung si kinsa ang suspek nga misunod sa biktima samtang kini naglakaw sa gamay'ng agianan diha sa gikahitaboan padulong sa ilang barangay.

Matud pa sa imbestigasyon ni SPO3 Alex Dacua ang biktima gikan pa nakig-inom ug nakigduwa sa iyang mga higalang sila si Allan Caballero ug Arnold Abellana diha sa sitio Plastikan.

Human niini midesider kini pauli apan pag-abot sa Punyang usa ka wala mailhing lalaki ang mibanhig kaniya.

Gisubay pa karon sa kapolisan kung unsay motibo sa pagpatay. Tulo ka basiyo sa kalibre 45 nga bala ang napalgan diha sa crime scene ug usa ka slug.