Tanod gi-ambush, patay

Patay ang usa ka tanod human kini banhigi samtang padulong pauli diha sa Alambujid Argao niadtong Biyernes sa gabii. Wala pa matino sa kapolisan sa Argao kun si kinsa ang suspek nga armado og kalibre 45 nga pistola nga mibanhig sa biktimang si Marlon Sarte, barangay tanod sa Tulang sa naasoy'ng lungsod.

Sa imbestigasyon ni PO2 Eliezer Canada, gikan pa ang biktima sa videokihan sa Alambujid, apan sa pagpauli niini padulong sa ilang balay giatangan sa suspk ug walay daghang pangutana gipaulanan kini og bala makadaghang higayon.

Patay diha-diha ang biktima tungod sa daghang igo sa kalawasan. Nakarekober ang kapolisan og unom ka basiyo sa kalibre 45 nga bala diha sa crime scene.

Usa sa mga mirespondeng polis nga si PO1 Eduardo Semilla mitug-an sa Banat News nga ang mga residente na maoy mitug-an kanila sa insidente pagka-alas 10 sa gabii tungod sa mga buto sa armas nga ilang nadunggan.

Ang maong dapit gitumbok sa kapolisan nga crime prone areas sa ilang dapit diin sagad nga dunay mga mahitabong krimen diha sa ilang lungsod.

Nagtuo di Semilla nga gi-ambush ang biktima apan gidul-itan kini pagpusil kay ang mga basiyo duol ra sa gihagbaan sa biktima. Nakaangkon si Sarte og samad pinusilan sa iyang liog, bitiis, tiyan ug likod.

Gisusi pa karon sa kapolisan kung si kinsa ang mga kauban ni Sarte nianang gabhiuna sa pag-inom diha sa videokihan sa Alambujid may tulo ngadto sa upat ka kilometro gikan sa balay niini sa Tulang.

Gibutyag sa kapolisan nga si Sarte dunay kasong pagpanunggab kaniadto sa wala pa kini mahimong tanod sa barangay Tulang apan wala pa matino kung may kalambigitan ba kini sa pagpatay sa biktima.

Nagtuo si Semilla base sa igo sa biktima dunay dakong kalagot ang suspek ngadto kang Sarte.