Eskuwater sa Talisay pangitaag kapuy-an

Ang suliran sa mga eskuwater maoy usa sa hatagan og prayoridad sa kagamhanan sa Talisay City ning umaabot nga tuig, matud pa ni Mayor Socrates Fernandez.

Ang tuig 2007, nga maoy gitakdang election year, maoy gitawag sa mayor og tuig nga bulahan tungod kay naandam na ang mga pagpatuman sa pagpamalit og yuta aron katukoran og balay sa mga eskuwater.

Wala pa ikasugilon sa mayor ko asang dapita ang yuta nga palitonon ug ingon man ang gidaghanon sa mga eskuwater nga makapuyo niini, apan gipaniguro niya nga makahatag kinig kalipay sa mga Talisaynon nga way tarong pinuy-anan.

Segun sa gilatid na nga plano sa Talisay City Development Council, gigahinan ning maong grupo og P10 milyones ang alang sa yuta ug panimalay sa mga eskuwater.

Matud pa ni Mayor Fernandez nga wala siya masayod unsay mahimong kapalaran niya sa umaabot nga election, apan ang gusto niya nga makatabang lamang siya sa mga eskuwater sa ngalang mga tawo sila nga nagkinahanglan og ayuda sa gobyerno.

Gawas niini, gibutyag usab sa mayor nga ikaduhang prayoridad niya mao ang pagpangayo sa mga karsada, pagpangabli og bag-ong mga barangay roads ingon man mga kahimanan sa panubig sama sa puso artesiano, suga, ug uban pa.

Lakip na niini ang bahin sa programa alang sa pagkaon pinaagi sa gitukod nga Talisay City Nutrition Council alang sa pag-atiman sa sustansyadong pagkaon sa taga Talisay ilabi na sa kabataang nagtungha.

Kauban usab sa mga gimbuhaton karong umaabot nga tuig mao ang pagpangayo sa mga imbormal ilabi na sa mga lugar nga lunopan panahon sa ting-uwan.

Miingon si Mayor Fernandez nga kining tanan anaa na sa mga listahan sa konseho nga gitugyanan sa paggama sa mga programa alang sa mga proyektong ipatuman karong sunod tuig.