Unang giigo sa mga tulisan mao ang Alano and Sons Finance Corporation nga gipanag-iya ni Beinvenida Alano ug girepresentahan sa tagdumalang si Jethro Paz, 28.
Duha ka mga wala mailhing mga lalaking pulos armado ug gituohang pistola nga may mga silencers luwan sa kolor blue nga motorsiklo ang miigo sa maong buhatan.
Matud pa sa imbestigador sa Fuente Osmeña police station nga si SPO2 Samson Go sa pakighinabi sa Banat News unang misulod ang suspek nga gibana-banang 5'8 nga nagsuot og itom nga t shirt ug nagkawo ug gihulagway nga maskulado kini og lawas.
Ang maong lalaki nagpakaaron-ingnong mo-inquire og loan, samtang giatiman kini kalit nga misulod ang ikaduhang suspek kinsa nagdala na og bag ug dungan silang mideklarar og tulis sa mga kawani.
Matud pang Go, gikuha sa mga suspek ang kapin P100 mil nga kwarta ug relo sa usa sa mga kawani nga si Arnol Oliverio ug dungan nga nanggawas ug nanakay sa kolor blue nga motorsiklo padulong sa direksyon sa barangay Capitol Site.
Dili layo sa gikahitaboan sa may bakery atbang sa buhatan sa Social Security System nadestino sila si PO1 Wilmer Naonao ug PO1 Dexter Montego, mga Field Training Program trainees sa Fuente police station uban sa usa ka tanod.
Matud pa sa duha ka polis wala sila'y nadungog ug nakit-ang komosyon diha sa gawas sa maong lending firm hangtud nga nakadungog na sila og tawag sa radyo kabahin sa tulis diha sa maong dapit.
Ang duha ka FTP mipahigayon dayon og roadblock sa eskina Escario ug Gorordo avenue bisan wala sila masayod kung hain gyud ang direksyon sa pag-ikyas sa mga suspek.
Diha nalang nahibaw-an human gitagsa-tagsa'g pangutana sa mga FTP ang mga tindahan ug nasuta nga ang Alano and Sons diay ang gitulis.
Gibasol karon sa kapolisan ang mga kawani tungod kay imbes nga magpakitabang dayon sa mga silingang establisamento human sa pag-ikyas sa mga suspek nanirado hinuon ang estabilisamento.
Gikatahong sayod na ang mga establisamento diha sa maong lugar nga dunay mga polis diha sa duol nga beat patrollers nianang mga orasa.
"Wala gyud lagi commotion, wala gyuy resistance didto, nahadlok man gud siguro ni sila," asoy pang Go.
Dangtan og 25 minutos, gitubag og tulis ang lain usab nga branch sa Alano and Sons nga mao ang G.A. Countryside Finance Corporation diha sa T.Padilla Extension sa barangay Tejero ning dakbayan nga gipanag-iya sa anak ni Beinvenida Alano nga si Gino Alano.
Sumala pang PO1 Ingrid Ignacio sa Theft and Robbery Section sa pakighinabi sa Banat News, base sa imbestigasyon ni SPO3 Alejandro Lopez nga sakay usab og kolor blue nga motorsiklo ang mga suspek.
Susama sa paagi pagsulod sa naunang gitulis, misulod ang usa ka lalaki nga gibana-banang 5'6 ngadto sa 5'7 ang height nga nagsuot og itom nga t-shirt ug maong, gibana-banang 28 ngadto sa 30 anyos ug dako'g tiyan.
Si Olive Natolia, ang loan processor miatiman sa lalaki tungod kay mo-aplay kini og loan, dangtan pila ka gutlo misulod usab ang usa ka lalaki nga 5'6 ngadto sa 5'7 ang height, nagsuot og itom nga t-shirt nga may linyang kolor yellow, itom shortpants ug semi opaw ang buhok.
Ang maong lalaki daling mideklarar og tulis ug gipangtiunan og armas ang mga kawani dungan sa pag-ingon og "Ipagawas ang kwarta", si Natolia gikuhaan sa P60 mil diha sa drawer ug duha ka tsekeng nagbalor og P29,568 ug P17,623.
Samtang ang kaherang si Rizel Ballega gimandoan pag-abli sa vault ug gikuha usab ang P17 mil nga kwarta dayong bahad kanila nga dili mogawas ug gipang-ibot ang linya sa telepono atol sa pag-ikyas sa direksyon sa pantalan.
Gisusi pa karon sa kapolisan kung si kinsa ang mga suspek ug kung usa ra sila ka grupo.