Counter-terror seminar gihimo

Agi'g pagpangandam sa umaabot nga ASEAN Summit, ang Police Regional Office 7 mipahigayon og upgrading seminars kabahin sa mga terorismo ug sa mga pamaagi niini ingon man ang mga angayang buhaton kun mahitabo kini.

Si Supt. Anthony Obenza, ang officer-in-charge sa Police Community Relations sa PRO7 mitug-an sa Banat News nga duha ka tagsa ka semanang seminar ang gitambungan karon sa mga opisyales sa kapolisan.

Kini ang Critical Incident Management Simulation Exercise (CIMSE) ug ang Incident Command System diin gilangkuban ang pagtuon sa danyos sa mga kemikal isip sagol sa pagpangatake sa mga terorista.

Ang seminar parehong nagsugod niadtong Lunes ug matapos karong Biyernes apan ang CIMSE diha gihimo sa Midtown hotel samtang ang ICS diha gibuhat sa PRO7.

Sa CIMSE, ang tanang police units sa rehiyon gihatagan og kasayuran sa programa sa RP-UK counter-terrorism programs, terorismo sa kalibutan, kaugalingong katakos sa PNP kontra terorismo.

Hisgutan usab ang pagabuhaton sa mga sakop sa kabomberuhan, emergency medical services panahon nga halapad nga pagpamomba ang mahitabo, ingon man kung unsaon pagpaabot sa media ang mga tukmang impormasyon kabahin sa insidente.

Matud pang Obenza, ang ICS usab gitumong aron pagtudlo sa mga "first responders" sa angayang buhaton aron dili masusama sa nahitabo sa mga first responders sa New York niadtong 911 terror attack sa World Trade Center.

Niadtong hitaboa, ang unang mga gatusang grupong miresponde nga gilangkuban sa labing eksperto ug hanas nga mga rescuers wala magdahum nga mahugno pa diay ang duha ka WTC buildings.

Dugang pa niini mao ang pagtuon sa kasayuran kabahin sa mga kemikal nga gamiton sa mga terorista sa ilang mga bomba nga posibleng biological weapons sama sa nerve gas, nukleyar, kemikal ug uban pang hazardous materials kun HazMat.

Matud pang Obenza, pinaagi sa maong kasayuran mas malikayan nga mahimong ikaduhang biktima ang mga moresponde ug mas mahimo organisado ang lihok sa mga tawong molihok sa operasyon.