Psych-ward sa VSMMC kula'g pundo

Giandam na karon sa hepe sa psychiatric department sa Don Vicente Sotto Memorial Medical Center (DVSMMC) ang iyang suwat sa pagpangayog tabang sa mga dagkong opisyal sa kagamhanan aron padak-an ang lugar alang sa mga pasyenteng nalisoan sa pangisip.

Miingon si Dr. Renato Obra, nga mao kini iyang buhaton human siya mapakyas sa iyang gipangayo kang Mayor Tomas Osmeña.

Sayo niini si Obra nagkanayon nga gihangyo niya si Osmeña nga unta padak-an ang kapasidad sa lugar nga gigahin alang sa mga nalisoan sa pangisip.

Kini tungod sa kagamay ra sa espasyo niini nga may 60-bed capacity ra, matud pa ni Obra.

Ang iyang gikinahanglan karon mao ang 500-bed capacity nga psychiatric center, tungod kay dili lamang taga Cebu ang ilang gidawat nga pasyente kundili bisan kadtong taga Bohol, Negros, Leyte ug usahay gikan pa gani sa Mindanao.

Apan gibatig kahiubos si Obra kay wa gyud siya makadawat og feedback gikan sa mayor.

Maoy hinungdan nga nakahukom siya sa pagpanghangyo kang Gobernador Gwen Garcia, ingon man kang Kongresista Antonio Cuenco, Raul del Mar, Nerissa Soon Ruiz, Eduardo Gullas, Antonio Yapha ug tanang mga kongresista sa Sugbo.

Matud pa ni Obra nga kon magpakahilom siya, way laing maalaot kundi ang mga pasyente ug silang mga nadestino sa maong tambalanan.

Matud pa ni Obra nga bug-at kaayo alang sa hospital ang pag-abaga sa mga gastohanan ning maong klase sa mga pasyente sanglit gawas sa tambal, pakan-on pa nila kini.

Kasagaran ra ba sa libog og ulo nga tawo dagko kaayog kaon, busa naproblema si Obra niini.

Nasayran usab gikan kang Obra nga matag adlaw dili mominus sa 30 ka tawo ang magpakonsulta diha sa DVSMMC bahin sa mental nga deperensya niini ug kasagaran kanila naa gyuy igpapaslak na sa psychotic ward.