Mireklamo kay sweldo gikuhaan sa HRO-Talisay

Duha ka kawani sa Human Resource Office sa Talisay ang gireklamo sa opisyal sa Commission on Audit sa siyudad tungod kay ang tulo ka job-order sa iyang buhatan gikaltasan sa sweldo sa walay igong hinungdan.

Si State prosecutor Elsa Equia miduso og reklamo diha sa buhatan ni Mayor Socrates Fernandez batok ni Juliet Cinco ug Luzviminda Montebon mga kawani sa HRMO tungod kay gikaltasan ang sweldo nila ni Sunshine Lacorte, Mirasol Baculfo ug Vanessa Wong.

Si Emily Cabrera, human resource officer sa siyudad mibutyag kagahapon sa Banat News nga ang maong reklamo naduso kini niadto pang Agosto.

Sa wala pa moreklamo si Equia adunay mitawag sa buhatan sa HRMO nga misulti nga walay tawo sa buhatan sa COA diin atol kini sa oras sa trabaho.

Matud ni Cabrera nga iyang gipasusi ang buhatan sa COA lakip na ang ubang mga buhatan sa city hall.

Napiho nga walay tawo sa buhatan sa COA og adunay gibutang nga suwat sa pultahan nga "wait lang sa".

Milakaw ang tulo ka nahisgutang kawani nga walay mga pass slip ug mibalik kini sa ilang buhatan mga alas 3:00 na sa hapon hinungdan nga nakaltasan ang mga sweldo niini.

Ang pass slip usa sa rekisitos nga tugotan sa paggawas ang mga kawani sa city hall nga mogawas atol sa oras sa trabaho kung aduna kini importante buhaton sa gawas nga dunay kalambigitan sa iyang trabaho.

Si Cabrera mibutyag nga ang tulo ka nahisgutang kawani mirason nga gisugo sila ni Equia dihang mibiya sila sa ilang buhatan.