Land swap deal sa CH ug kapitolyo madayon tungod sa mga senyales

Bisan pa og dili mahinayon ang planong pagtugyan sa kagamhanan sa siyudad sa Sugbo sa Cebu City Medical Center (CCMC) ngadto sa probinsya sa Sugbo dako gihapon ang kahigayunan nga molampos ang nalangay nga kontrobersyal nga land swap deal tali sa siyudad ug kapitolyo.

Matud ni City Administrator Francisco Fernandez hinayhinay nang niabli og balik ang maayo nilang komunikasyon tali sa kapitolyo may labot sa maong isyu.

Kamatuoran niini gibutyag ni Fernandez nga nagkahinabi na usab sila ni Provincial Legal Officer Marino Martinquilla.

Pagkakaron padayong giasikaso ni Fernandez ang ubang mga gimbuhaton diha sa iyang level nga makapalig-on og balik sa naputol nga transaksiyon.

Tinguha gyud sa siyudad nga masalbar ang gibana- banang singko mil ka mga urban poor nga nagpuyo sa luna sa kapitolyo nga nahimutang sa Barrio Luz, Kamputhaw, Apas, Lahug, Hipodromo ug Kalunasan pinaagi sa pagbaylo sa kwatro hektaryas nga luna sa siyudad diha sa North Reclamation area.

Pagkakaron hinayhinay nang nipakita og interes si gobernador Gwen Garcia pagdawat sa CCMC isip kabahin sa land swap deal apan gipaubos pa kini karon sa imbentaryo.

Nasayran nga naputol ang maong transaksyon dihang nangluod si gobernador Garcia ug ang mga sakop sa hunta probinsyal human makabati og sakit nga pulong gikan sa konseho sa siyudad sa Sugbo pinangulohan ni Bise mayor Michael Rama.