Sakop sa PBMA kuhaa'g pusil

Usa ka gidudahang sakop sa Philippine Benevolent Missionaries Association ang nadakpang misuway og palusot og armas diha sa barkong molawig pangadto sa Mindanao niadtong milabay'ng gabii diha sa Pier Uno ning dakbayan.

Ang suspek giilang si Inone Estrada,27, nga taga Dinagat Island kinsa padulong na unta mopauli sa ilang probinsya dihang nakapkapan sa mga sakop ni Inspector Dante Mabasa sa PNP Maritime police ang iyang bag.

Gikatahong naabli ang bag ni Estrada ug migimaw ang sumbohan sa usa ka 'frontier' single shot nga armas nga may tulo ka buhing bala sa armalite.

Matud pa sa suspek sa pakighinabi sa mga tigbalita napalit niya ang armas sa dakbayan sa Danao sa kantidad nga P600 ug plano unta niya kining ibaligya og P3,000 ngadto sa ilang lugar aron ang sobra ibayad sa iyang mga utang.

Dugang pa niini nga nakatrabaho siya kaniadto dinhi apan human matangtang sa trabahoan miestambay siya og makadiyot sa dakbayan apan nakadesider nga mobalik nalang sa ilang probinsya.

Ang maong armas giputos og mga sinina ni Inone una pa niya kining gisulod sa bag apan diha palang sa may paril una pa makasaka sa damyo aksidenteng naabli ang bag niini ug migimaw ang armas.

Ang suspek kasamtangang gitanggong karon sa Mabolo police station samtang giandam na ang kaso batok kaniya.