Politika sa Medellin sugod na

Nangangkong pildihon ni Bokal Joven Mondigo si Bise-Mayor Ricardo Ramirez sa ila unyang panagsangka sa pagka-mayor sa lungsod sa Medellin kon mahinayon ang eleksiyon sunod tuig.

Si Ramirez ang paluyuhan sa kampo ni kanhi Kong. Celestino "Junie" Martinez sa ikaupat nga distrito samtang nibiya sa ilang grupo si Mondigo ug nitapon sa kampo ni Gob. Gwen Garcia.

Si Mondigo ang kusganong gipaluyuhan sa katawhan sa lungsod sa Medellin samtang si Ramirez gipaluyuhan usab sa mga asyendero base sa usa ka survey nga gipahigayun human sa iyang pagbiya sa kampo ni Martinez.

Apan matud pa ni Mondigo nga adto na gyud maklaro ang tinuod nga sentimento sa katawhan human sa eleksiyon kon nakauyon pa ba kaniya.

Iya hinoon gipasalig nga kon dili siya mauyunan sa katawhan, andam siya modawat ug dili mosamok sa mamunoan unya sa ilang lungsod.

Si Mondigo nahimong mayor sa lungsod sa Medellin sa tuig 1980 hangtud sa 1998 kauban ni Mayor Manreza Lim isip iyang bise-mayor.

Napili si Mondigo sa pagka-bokal sa tuig 1998 hangtud karon ug gidid-an na sa balaud nga makapasubli sunod eleksiyon ingon man si Lim nga anaa usab sa iyang katapusang termino.

Gihugunhugunan nga ang anak ni Lim nga si konsehal Alfonso Lim ang mopares isip bise-mayor ni Mondigo sunod eleksiyon ubos sa kampo ni Garcia batok sa kandidato usab nga paluyuhan ni Martinez.

Si Mondigo giila nga usa sa lig-ong lider kanhi ni Martinez sa distrito apan napugos kini pagbiya human gikatahapan nga nagpaluyo na kini kang Garcia gumikan sa iyang pagsuporta sa mga programa sa gobernador. Walo ka tawo 'sikop atol sa drug ops Ni Romeo T. Limpangog

Mokabat sa 96 ka gagmay nga pakete ug duha ka medium nga pakete sa gituohang shabu ang nasakmit sa kapolisan gikan sa walo ka tawo nga gikatahapang mga drug pusher.

Si PO2 Bruce Gairanod sa vice squad section sa Mandaue City Police Office (MCPO) maoy nangulo sa buy bust operation sa nagkadaiyang dapit niini niadtong miaging gabii.

Kini giila nga mao sila si Dimple Cabanay, taga Guizo, Randy del Castillo, 41, taga Maguikay, John Pableo, 27, taga Sitio Anakma, Pagsabungan, Kacheilin Gahica, 24, taga sitio Anakma, Pagsabungan, Romer Cartagena, 19, taga sitio Anakma, Pagsabungan, dakbayan sa Mandaue.

Dugang nadakpan mao sila si Angelita Bate, 27, taga Kalubihan, Looc, Roger Pasilan, 26, taga zone 3, Mantuyong, Wilfredo Loberarisa, 47, taga sitio Liong, Alang-Alang sa mao gihapong dakbayan.

Si Senior Superintendent Eduardo Catabas, director sa MCPO nga gikahinabi sa Banat News miingon nga ang gihingusgang pagsikop sa tigpayuhot og ilegal nga drugas kabahin sa pagpatuman sa kahapsay ug kalinaw sa 12th Asean Summit karong Disyembre.

Nunot sa pagkasikop sa maong mga suspetsado ang kapolisan nakasakmit og mga kahimanan sa paggamit ug mga minarkahang salapi nga maoy lig-ong ebidensiya sa kasong ipasaka nga pagpayuhot og ilegal nga drugas. - Romeo T. Limpangog