Seguridad sa kalag-kalag higpit

Halapad nga pagpangandam sa seguridad sa dakbayan sa Sugbo ang gipatuman sa Cebu City Police Office alang sa umaabot nga paghinumdom sa adlaw sa mga Santos ug sa mga minatay.

Ang kapolisan nangandam na sa pagbutang og gatusang mga polis sa mga sementeryo, simbahan ug mga terminal diin dunay bagang duot sa katawhan.

Ang mga Field Training Program trainees ug ingon man mga sakop sa CCPO ipakatap unya sa maong mga dapit lakip na ang mga Emergency Medical Services.

Ang Police Regional Office 7 mipagawas na og direktiba alang sa luwas ug hapsay nga paghinumdom sa maong mga adlaw.

Lakip sa gitinguha mao ang koordinasyon sa kapolisan ug mga non-government organizations (NGOs) nga dunay kalihukan sa maong mga adlaw.

Gipaabot nga mograbe ang duot sa trapiko duol sa mga dapit diin dunay mga sam-ang ug simbahan lakip na mga terminal hinungdan nga gipatuman sa kapolisan ang re-routing sa mga sakyanan.

Samtang gipanid-an usab ang hulga sa terorismo ug mga kriminal nga mosiaw sa maong mga adlaw.

Si Mandaue City Police Director Eduardo Catabas mialerto na sa mga hepe sa unom ka presinto, Special Weapon and Tactic, (SWAT) Criminal Intelligence and Investigation Bureau (CIIB) ug uban pa.

"Criminal elements are expected to undertake their illegal activities not only in cemeteries but also in transportation terminal where people taking a ride to their respective hometowns," nagkanayon si Catabas.

Gidili ang pagdala og armas ug ilimnong makahubog sa sulod sa sam-ang atol sa maong adlaw sa kasaulogan.