Dili ikapasalig ni Rupinta nga hingpit nga mawala ang VK

Dili kapasalig si Kapitan Felicisimo Rupinta sa Ermita nga mawagtang sa hingpit ang kalihokan sa ilegal nga sugal ug drugas sa iyang barangay, luyo sa bahad ni Mayor Tomas Osmeña kaniya.

Matud pa ni Rupinta sa pakighinabi nga dako kaayong risgo sa iyang kinabuhi ang pagpugos sa taga Ermita paghunong sa pagka-caretaker sa video karera (VK) machines ug sa pagpamaligya sa ginadiling drugas.

Maoy hinungdan nga kon matino ang presensya niini ila nalang kining ipahibawo sa kapolisan.

Gani sa ronda niadtong Lunes sa kaadlawon, si Rupinta nagkanayon nga daan na niyang gipasidan-an ang tanang naghupot og VK niana pang Domingo atol sa asembliya sa kabataan sa iyang barangay.

Apan dihang wa gyud patuo kaniya ang mga hingtungdan, siyay misumbong ngadto sa kapolisan ug maoy hinungdan sa ronda diin kapin 100 ka polis ang mihimo.

Sa maong ronda may 35 ka V ang nasakmit apan nianang pagkahapon may dugang duha pa nga nasakmit si Rupinta ug iya kining gihatod dayon ngadto sa kapolisan.

Sayo niini mibahad si Mayor Tomas Osmeña nga isalikway sa partido si Rupinta kon may mga VK pa ug moli-moli nga makina nga masakpan diha sa Ermita.

Kini tungod sa pagduda sa mayor nga may kasayuran ang mga opisyales sa barangay sa maong sugal.

Apan alang kang Rupinta nga gitamod niya ang bahad sa mayor ug dili niya kini mabasol nga magduda kaniya nga may labot niining kalihokan sa VK sa iyang barangay.

Apan matud pa ni Rupinta nga dili niya ikapasalig nga mawagtang sa hingpit ang VK ug ilegal nga drugas sa iyang lugar, basta ang mahinungdanon nga kanunay niya kining gibantayan.

Midugang si Rupinta nga naglatay karon sa usa ka lugas lanot ang iyang kinabuhi sa iyang gihimo nga pagbutyag sa kapolisan sa mga VK sa Ermita apan daan na siyang nangayog pasaylo sa mga hingtungdan gumikan sa kagahi nila mosanong kaniya.