Dugang 8-hr shift sa CITOM tubag sa traffic

Giawhag ang City Traffic Operation Management (CITOM board ) nga tun-an ang posibilidad nga pagpatuman sa duha ka hugna nga 8-hour work shift ngadto sa mga traffic enforcer nga maoy gitahasan pagpatunhay sa mga lagda sa trapiko dinhi sa dakbayan.

Si Konsehal Arsenio Pacana nakahunahuna niining maong paagi human daghang mga aksidente sa kadalanan ang sagad mahitabo sa gabii o lapas na sa office hours diin off duty na ang mga traffic enforcers.

Nasayran nga ang mga traffic enforcers mo-duty lang sulod sa otso oras matag adlaw gikan sa alas 8:00 sa buntag hangtud sa alas 5:00 sa hapon.

Apan tinguha karon sa konsehal nga mapun-an og laing shift nga walo ka oras sa gabii aron magpabiling dunay mga traffic enforcers ang mopatunhay sa lagda sa trapiko panahon sa gabii.

Gihulagway sa konsehal nga ang kadaghanan sa mga aksidente sa kadalanan nga mahitabo panahon sa gabii nagumikan kini sa mga motorista nga malapason sa lagda sa trapiko.

Pagkakaron ang buhatan sa Citom naglisud og pundo nga ibayad alang sa overtime pay niadtong mga enforcers nga mo-duty lapas na sa office hours.