Matud ni Osmeña atol sa press conference kagahapon sa buntag ilang supakon sa korte ang legalidad sa maong direktiba nga giluwatan ni kanhi DILG Secretary Jose Lina niadtong tuig 2002.
Ang maong direktiba nagmando nga walay katungod ang mga Local Government Units (LGU) nga makaputol o makausab sa travel routes nga gihatag sa Land Transportation Franchising and Regulatory Board (LTFRB) ngadto sa mga pampublikong sakyanan.
Ang presidente sa NADSU Antonio Pogado, misukip ning maong direktiba sa position paper nga ilang giduso ngadto sa konseho sa siyudad sa Sugbo nga naghangyo nga katugotan ang mga PUJ unit sa Mandaue nga rota nga makalahos og balik pagpamasahero sa Osmeña Boulevard ug Colon area.
Apan pabiling lig-on ug wala matarog ang baruganan ni Osmeña tungod kay alang niya mas lig-on ang ilang gihimo karon nga pagsubay sa local autonomy nga maoy nalatid sa Konstitusyon.
Hangtod karon pabiling nagmagahi ang mayor pagsanong sa hangyo sa NADSU nga i-release na ang 70 ka mga PUJ sa 21B ug 22B nga rota nga na-impound sa yarda sa Citom human kini madakpi tungod sa padayong pagpamasahero lahos dinhi sa dakbayan bisan pa man sa pagpatuman sa City Ordinance 1837 nga nagdili sa mga PUJ sa Mandaue pagpamasahero dinhi sa siyudad sa Sugbo.