Basura sa San Nicolas magbansiwag sa Summit

Ning nagsingabot nga Asean summit, walay labing hugaw nga barangay karon ning siyudad gawas sa San Nicolas-Proper.

Matud pa ni William Batarilan, dispatser sa mga trak sa basura sa Department of Public Service (DPS) nga kun dili sila makaantos isumbong nila ngadto kang Mayor Tomas Osmeña nga ang kapitan sa San Nicolas Proper nga si Cenon Bacus dili makapitol sa iyang mga molupyo.

Miingon si Batarilan nga mao kini naghatag og labad sa ilang ulo karon kay inighuman nilag hakot sa basura sa buntag, inigkataod-taod mao na usab og bungtod ang laundok sa mga basura nga anha itapok kilid sa San Nicolas District Sports complex sa simbahang Katoliko sa San Nicolas de Tolentino.

Miingon si Batarilan nga ang kakuwang nila sa sakyanan sa basura, maoy usa sa mga hinungdan nga tagsa ra sila mohakot sa basura sa matag lugar matag adlaw.

Apan bisan niini, si Batarilan nagkanayon nga kon motabang pa lang unta ang mga opisyal sa barangay pagdesiplina sa ilang mga molupyo, magabii ra unta sila palabaya sa basura aron sa tibuok adlaw hinlo ang palibot sa ilang barangay.

Nasayran sa gihimong imbestigasyon ni Batarilan, nga may mga tawong modawat og "tong" sa mga tiglabay og basura diha sa San Nicolas.

Miingon si Batarilan nga gikan sa upat ka barangay ang mga tiglabay og basura dihang dapita nga naglakip sa barangay Pasil, Sawang Calero, Suba ug diha mismo sa San Nicolas.

Miingon si Batarilan nga kon may "political will" lang ang mga opisyal sa barangay diha sa San Nicolas, dakpon unta kining giingon mangayog tong diha sa mga tiglabay og basura aron wa nay magpadasig sa pagyabo sa ilang hugaw dihang dapita.