Kawani sa munisipyo namatay sa aksidente

Hamtong nga lalaki namatay samtang nagsakay sa motorsiklo human maigo sa Ceres Bus nga iyang gikasugat ug maayong pagkalagpot sa sementadong dalan niadtong Sabado sa hapon sa National highway Coro, Dalaguete.

Ang namatay mao si Tranquilino Muñoz alyas Franklin minyo ug empleyado sa munisipyo sa Dalaguete ug nagpuyo sa Barangay Cosal.

Ang Ceres bus nagtangag sa plaka FVZ 148 body no. 8036 nga gipanag-iya sa Villacar Transit sa Mansilingan, Bacolod City ug gimaneho ni Anaclito Cepada Damoa Jr. 33 minyo lumad nga taga Comaang, Clarin, Bohol.

Segun sa report sa kapolisan pasado alas 3 sa hapon sa Sabado ang biktima nagmaneho sa iyang motorsiklo Honda M70 gikan sa iyang panimalay sa Cosal paingon sa habagatang bahin.

Si PO1 Maximo Belciña sa Dalaguete mitug-an sa Banat News nga samtang nagsunod ang biktima sa trak de karga sa gamay nga kurbadahon kalit kining mi overtake sa iyang gisundan apan wala kini makabantay nga diha usab ang Ceres nga iyang gikasugat hangtod nga wala na makabalik pa sa lugar ang biktima ug naigo.

Si Muñoz human maigo sa bumper sa Ceres bus nabuwag sa motor ug nalagpot sa aspalto.

Daling gidala si Muñoz sa Dr. Ildefonso Alcantara Memorial Hospital gumikan sa samad ug bun-og sa kalawasan lakip ang ulo niini apan patay na kining naabot sa maong tambalanan.

Human sa aksidente, si Damoa daling misakay sa laing Ceres bus biniyaan ang mga pasahero ug misurender ngadto sa Argao Police Station.

Dangtag pila ka minutos si Damoa gi pick-up sa kapolisan sa Dalaguete gipangulohan sa hepe nga si Sr. Insp. Claro Binatero ug gitanggong na karun sa detention cell samtang nagpaabot sa tukmang kaso nga ipasaka batok kaniya.