2 ka tawo nangita og shabu gipamusil; 1 patay

Duha ka tawo nga nangita og shabu kalit lang gipamusil ug usa kanila ang naigo ug grabeng naangol ug namatay dihang gidala sa Mandaue City District Hospital.

Nahitabo kini alas 3 pasado sa kaadlawon sa Zone III, Mantuyong, Mandaue.

Ang namatay mao si Jose Hernandez, 42 minyo nga nagpuyo sa Sitio Tribunal, Centro, Mandaue.

Si SPO1 Noli Cabarubias sa kapolisan sa Presinto 1 sa Centro Police Station maoy miila sa biktima dihang gikahinabi sa Banat News kagahapon sa buntag.

Matud pa ni PO1 Cabarubias nga si Darrel Navares, 22 ulitawo ug nagpuyo sa maong dapit maoy kuyog sa biktima sa pagpalit unta og shabu.

Si Navares dihang ilang gisukitsukit ni PO1 Cabarubias miasoy nga gisundan sila sa wala mailhing lalaki nga nagdala og mubo nga matang sa armas sa ilang pagbiya sa maong dapit.

Dugang pa ni Cabarubias nga nakahigayon sa pagdagan pahilayo si Navares sanglit wala kini maigo sa pagpamusil.

Si Cabarubias miingon nga ang kalambigitan sa pagpamaligya og shabu sa pipila ka tawo sa interior nga bahin sa Mantuyong maoy ilang gituohan sa kapolisan nga motibo sa maong pagpamusil.