Amahan gipatay sa anak

Patay ang amahan human gidunggab sa iyang kaugalingong anak sa dihang mitumaw ang ilang panaglalis bahin sa kuwarta sulod sa ilang pinuy-anan sa Balamban.

Kini nahitabo pasado alas 12:43 sa udto niadtong Sabado sa Sitio Menteryo Daan, Pundol Balamban.

Ang biktima mao si Jeremias Oberes Canedo 45, usa ka mananagat ug nagpuyo sa nahisgutang lugar.

Ang midunggab sa biktima kinsa nasikop sa kapolisan human sa hitabo mao ang anak nga si Romel 19, ulitawo nga usa usab ka mananagat.

Ang biktima nga si Jeremias nakaangkon dili monimos lima ka samad dinunggaban sa nagkadaiyang bahin sa kalawasan lakip na sa dughan ug buko-buko.

Dali kining gidala sa Balamban District Hospital apan nakabsan nang daan sa kinabuhi pag-abot sa maong tambalanan.

Segun sa report sa kapolisan ang suspek nakainom atol sa maong hitabo.

Base sa gihimong imbestigasyon sa kapolisan gipangulohan ni PO3 Celso Diaz nasayran nga ang biktima ug ang suspek nagkalalis hangtod nga miresulta sa mainiton nga panaglalis ug misangko sa pagpanunggab sa anak gamit ang kutsilyo nga may gitas-on nga 8 pulgados.

"Kulatahon man kuno ni siya (suspek) pirme sa iyang amahan unya gibunalan pa kuno og tubo, niinom lang gyud ni siya ug tuyo ang anak para makasukol sa amahan, basin gikargahan pud ni nga sukli imong amahan laktud pagkasulti giyawaan seguro ning suspek," asoy ni PO2 Eugene Macapas sa dihang nahinabi sa Banat News sa gihimong follow-up kagahapon.

Matud ni PO2 Macapas nga walay silingan nga nakaako pagduol aron uwangon ang biktima ug ang suspek kay pulos nangahadlok.

Ang suspek kinsa miisa sa iyang duha ka kamot pag-abot sa miresponding kapolisan nakuhaan og kutsilyo nga gigamit pagdunggab sa iyang amahan.

Gitanggong ang anak sa detention cell ug karong adlawa gitakdang pasakaan og kasong parricide.