Nadsu way pinaskuhan ni Tomas

Gisalikway ni Mayor Tomas Osmeña ang hangyo sa Nagkahiusang Drayber sa Sugbo (NADSU) nga nagpakilooy nga marelease na ang mga PUJ sa mga rotang Mandaue-Jones nga gipangdakop sa Citom ug katugutan na silang makabalik sa karaang rota nga Osmeña Boulevard ug Colon Area.

Ang NADSU pinaagi sa ilang presidente nga si Antonio Pogado miduso og position paper sa konseho nga naghangyo kang Osmeña nga i-release na ang 70 ka unit nga na-impound ug tugotan na silang makalahos sa pagpamasahero dinhi sa siyudad sa Sugbo.

Nanghinaut ang maong grupo nga mahumok ang baruganan sa mayor ug mohatag kini og konsiderasyon nunot niining nagsingabot nga Pasko.

Apan giklaro ni Osmeña nga walay mapaabot nga pinaskuhan karong tuiga ang maong mga drayber nga gihulagway sa mayor nga badlungon ug masinupakon sa balaod.

Giprangkahan ni Osmeña nga kun mao man kini gipangayong pinaskuhan sa mga drayber posibleng sa pasko sa sunod pang tuig niya kining mahatag og dili karon.

Kini tungod kay gusto ni Osmeña nga ang korte maoy mosulbad niining maong problema human mipasaka og kaso ang NADSU sa korte batok niining pagpatuman sa Citom sa City Ordinance 1837 nga nagdili sa mga PUJ sa Mandaue nga makalahos sa pagpamasahero dinhi sa siyudad sa Sugbo.