50 grams shabu nasakmit sa buy-bust sa Guadalupe

Gibanabanang 50 gramos nga gidudahang shabu nasakmit sa kapolisan atol sa buy-bust operation nga gilusad sa Vice Control Section batok sa duha ka gitumbok nga notadong mga drug pushers sa Guadalupe.

Si Sr. Inspector George Ylanan, hepe sa VCS, nakadawat og impormasyon kabahin sa kalihukan sa mga suspek nga sila si Rupert Cabilao Gabutan, 31 ug Precious Montellano Rubi, 28, parehong nagpuyo sa Buena Hills sa Guadalupe ning dakbayan.

Ang duha nasikop diha sa usa ka gasoline station sa Banawa, Guadalupe niadtong Sabado sa hapon human makigsabot ang kapolisan nga palitan sila og napulo ka bultong shabu.

Matud pang Ylanan sa pakighinabi sa Banat News nga ang usa ka bulto nagkantidad og P14,500 sa presyong gihatag kanila sa mga suspek.

Dugang pa ni Ylanan nga si Rubi maoy asawa ni Ryan Rubi, usa sa gidudahang mga bigtime drug pusher sa dakbayan kinsa nadakpan usab sa mga sakop sa Philippine Drug Enforcement Agency-7 pila na ka bulan ang milabay diha sa usa ka hotel sa dalan Colon ning dakbayan.

Matud pang Ylanan si Gabutan maoy alalay ni Rubi niadtong tungura maong naapil kini og kasikop.

Nakuha gikan kanila ang gibana-banang 50 gramos nga gidudahang shabu, duha ka P1,000 nga marked money lakip na ang mga pinutol nga mga papel.

Gikatahong nangrason si Rubi kang Ylanan nga maong mibaligya siya og drogas tungod kay gikinahanglan niya ang kwarta tungod sa iyang nasakit nga anak nga naa pa sa tambalanan.

Matud pang Ylanan nga sukad nga nadakpan ang bana ni Rubi nga si Ryan, ang babaye na maoy mipuli sa negosyo sa iligal nga drogas diin tibuok dakbayan ang ilang operasyon.

'Dinagko man ning ila, sila man maoy kumprahanan anang mga street level drug pushers,' asoy pang Ylanan.

Ang duha gikatakdang pasakaan og kaso karong adlawa diha sa piskalya tungod sa paglapas sa Akta Republika 9165.