'Nagbahig' og shabu arestado

Dakpan sa akto ang usa ka 34 anyos nga lalaki kinsa gipasanginlang nagbahig og gidudahang shabu diha sa may daplin sa dalan J.Seno sa barangay Mabolo ning dakbayan niadtong Biyernes sa kaadlawon.

Ang nadakpan giilang si Arnel Debolan,34, residente sa maong dapit kinsa nakuhaan og duha ka paketeng shabu ug usa ka kalibre 38 rebolber nga may upat ka buhing bala ug usa ka basiyo sa tambor niini.

Ang grupo ni SPO1 Ricardo Escobedo ug PO1 Mario Agda sa Mabolo police station kasamtangang naglakaw nga nagpatrolya sa maong dapit dihang nasigpatan ang suspek nga nagbahig og gidudahang shabu.

Dihang gisitar, gikatahong misutoy og dagan si Debolan apan gigukod kini sa mga polis ug naabtan.

Sa paghiling sa iyang bulsa, nakuha ang maong drogas lakip na ang maong armas.