Peke nga pari miilad sa Briton

Nailad ang usa ka British national uban sa iyang asawa sa nag-inusarang lalaki nga nagpailang pari sa Cathedral dayong pangayo'g hinabang kagahapon sa buntag pasado alas 9 sa Sitio Sindulan, Mabolo ning dakbayan sa Sugbo.

Segun sa report sa kapolisan nagpa-blotter ang magtiayon pasado alas 11 na sa buntag sa dihang nakamatikod nga sila nailad.

Maayo nalang gani kay P10 mil ray nahatag sa magtiayong Clive Eduards ug Cherry Avenido Eduards, pulos hingkod ug nagpuyo sa usa ka apartment sa naasoy'ng lugar.

Ang suspek nagpaila pa sa biktima nga Francis Avenido ug gibanabanang nagpangedaron og 30 anyos pataas ug 5'6" ngadto sa 5'7".

Base sa pasiunang imbestigasyon sa Mabolo Police pinaagi ni SPO2 Lorenzo dela Cruz nasayran nga ang magtiayon diha sa sulod sa gipuy-an niining apartment.

Apan kalit lang dunay nanuktok sa pultahan sa biktima.

Matud ni SPO3 Jacalan nga nagpaila ang maong lalaki sa Briton nga ig-agaw siya ni Cherry ug siya usa ka pari nga naa mag-alagad sa Cathedral dayong pangayog hinabang.

Si Clive mihatag og P5 mil sa suspek apan mireklamo kining kuwang ang gihatag.

Suma ni Jacalan ang asawa nibalibad unta sa gipangayong dugang sa suspek kay igo na ang hinabang nga P5 mil nga ilang gihatag.

Apan gumikan sa kamaayo sa Briton gipun-an og laing P5 mil.

Human madawat sa suspek ang kuwarta yano ra kaayong naglakaw palayo na sa lugar.

Ang kapolisan sa Mabolo nagpadayon sa ilang gihimong pakisusi aron mailhan ang lalaki nga miilad sa magtiayong Eduards.