Tulisan misakiyo sa P66mil

Nag-inusarang tulisan misakiyo og P66 mil nga halin sa usa ka tindahan og panapton diha sa dalan Magallanes sa barangay Sto. Niño ning dakbayan kagahapon sa buntag.

Ang gitulis mao ang Chem Leather Marketing nga gipanag-iya sa usa ka Ronald Tan, gitumbok nga mitulis kanila mao ang nag-inusarang suspek nga armado og wala matinong kalibre sa armas.

Matud pa sa imbestigasyon sa Waterfront police station gipasulod sa luyong bahin sa tindahan ang mga tinderang sila si Ronalyn Tecson ug kaubang si Hazel Drego.

Matud pang PO1 Romeo Cacoy ang suspek misulod dihang si Drego gikatahong migawas sa atubangan aron paglabay og basura ug gitiunan og armas ang mga tawo sa sulod.

Giingong gikuha sa suspek ang halin sa kinse ka adlaw nga paninda diha sa kahera nga P66 mil apan gikatahong si Tecson nagmagahi maong gibukbok kini sa suspek.

Lakip sa gikuha mao ang usa ka cellphone nga nagkantidad og P3 mil ug ang mga biktima gipasulod sa usa ka lawak atol sa pag-ikyas sa suspek.