CICC magamit gyud

Gipasalig ni Vice Governor Gregorio Sanchez nga mahuman gyud ang Cebu International Convention Center (CICC) karong Nobiyembre 15, 2006 sumala sa kontrata nga giintrahan tali sa kontraktor ug sa kagamhanan sa lalawigan.

Bisan wala siya motumbok kon kinsay mapildi sa postahanay tali ni Architect Manuel Guanzon ug kanhi Senador John Sonny Osmeña, apan gipaniguro ni Sanchez nga magamit gyud sa ASEAN Summit ang CICC.

Hinuon gibutyag ni Sanchez nga dili kalikayang aduna gyuy "correction" sa mga pipila ka bahin niini sama sa naandan nang mahitabo sa matag dagko ug gagmay'ng konstruksyon.

Apan ang maong korihianan matawag nga "negligible" na ug unya na usab kini himoa human na sa opisyal nga "turn over" niini sa kontraktor ngadto sa kagamhanan sa lalawigan.

Maoy hinungdan nga matud pa ni Sanchez nga matag kontraktor naa gyuy "warranty" nga ikapasalig alang sa mga korihianan inighuman na sa maong proyekto.

Gitumbok ni Sanchez nga ang kulang nalang karon mao ang pagpanaod sa escalator, elevator, air conditioning unit, carpet, ug uban pa nga dali nalang kaayo kining buhaton.

Ang gawas ug sulod nga bahin sa edipisyo sama sa parking lot, dali ra kaayo kining humanon, matud pa ni Sanchez.

Isip usa ka batid nga enhinyero ug karaang kontraktor, nasayod kaayo si Sanchez sa dagan sa trabaho ning CICC nga gidesinyo ni Guanzon.