... CCPO di maigo — Gayotin

Dili maigo ang mga edipisyo sa Cebu City Police Office diha sa lunang giangkon sa kapitolyo nga iya sa lalawigan.

Kini maoy pamahayag ni CCPO acting director Melvin Gayotin sanglit base sa giangkong luna sa kapitolyo nga lot 646 nga may kinatibuk-ang gilapdong 6,172 square meters, 2,172 lamang niini ang nasulod sa Camp Sotero Cabahug.

Kining maong 2,172 sq.meters matud pang Gayotin manukad 20 metros gikan sa gate hangtud diha sa may flag pole.

Sulod sa 2,172 sq.m. maigo mao ang mga tenants nga PNP national support groups nga gilangkuban sa Traffic Management Group-7, Criminal Investigation and Detection Group-7, PNP Crime Lab-7, Dental Health Service ug parte sa PNP Medical Health Service.

Matud pang Gayotin ang luna sa CCPO nasakop sa lot 645 nga dunay gilapdong 24,568 sq.meters nga gipanag-iya sa PNP pinaagi sa Presidential Decree.

Sila si CIDG-7 director, Sr.Supt. Jorge Corpuz, Sr.Supt. Nestor Sator sa PNP Crime Lab-7 ug TMG-7 director,Supt. Abdalun Awilun sa pakighinabi sa tigbalita nagkanayon nga wala silay mahimo kung kuhaon sa kapitolyo ang ilang luna.

Apan masaligon silang hatagan sila og relokasyon nga kabalhinan sanglit maapektahan sila sa ilang operasyon.

"Ang executive decision mahirap na pakialaman ng mga law enforcers na katulad natin, we will have to abide on them but later on, siguro magpo-provide din sila sa atin ng malilipatan," asoy pang Awilun.

Si Corpuz sa iyang bahin nagkanayon nga karong nasayod na sila sa basihan ug kung si kinsa ang pangutan-ong buhatan kabahin sa nanag-iya sa luna mahimo nang kasugdan ang posibleng kasabutan tali sa ilang buhatan ug Kapitolyo, apan misaad nga mobalhin sila kung imando.

Samtang si Sator mitug-an nga malaumon siyang una sila papahawaon makakita na sila og kabutangan sa ilang laboratoryo apan midugang nga paborable ang kasamtangang lokasyon sa PNP Crime Lab tungod kay natunga kini sa lalawigan.