Apil sa sedula tampering balik sa CH

Mibalik na sa pagtrabaho sugod kagahapon sa City Treasurers Office sa Cebu City Hall ang usa sa duha ka mga kawani niini nga gipasanginlang nalambigit sa pag-tamper sa presyo sa sedula nga lukaton sa mga negosyante dinhi sa dakbayan sa Sugbo.

Nasuta nga mibalik na og duty kagahapon si Melafe Tayuna diha sa Business Permit Section paglabay sa duha ka adlaw human mabulgar ang anomaliya sa pag-tamper sa mga sedula, apan pabiling wala mopakita sa City Hall ang kauban niining si Gwendolyn Pacaña sukad nabulgar ang maong anomaliya.

Gipadayag ni Tayuna dihang nahinabi sa Banat News nga wala siya motago ug molikay sa maong nabulgar nga kontrobersya ug iyang gitug-an nga wala siya makatunga sa City Hall sa milabay'ng adlaw tungod kay nag-atiman siya sa iyang duha ka mga anak nga gipanghilantan.

Si Tayuna nga atua magpuyo sa dakbayan sa Talisay mipresentar sa mga tigbalita sa duha ka klase nga medical certificate niini nga pirmado ni Dr. John Tan nga nagpamatuod nga gipanghilantan ang duha ka mga anak niini.

Mipasalig hinuon si Tayuna nga moatubang sa himuong imbestigasyon sa National Bureau of Investigation (NBI) ug City Treasurers Office.

Matud ni Tayuna wala siyay nahibaw-an kun nganong wala gihapon motunga sa serbisyo si Pacaña apan dako ang iyang pagtuo nga posibling nanganak kini tungod kay daan na kining gipasidan-an sa iyang doktor nga posibleng manganak na karong semanaha.

Dunay upat ka kompaniya ang nadiskubrihan ni City Treasurer Tessi Camarillo nga gipang-tamper ang presyo sa triplicate copy sa gi-isyu niining sedula sama sa Axcess Pharma, Dayang Xiyi Phil. Inc., Best Choice Home Real Development Corporation ug PC Wise Corporation diin ang tag P500 niining bayranan gipagamyan ug gihimo nalang kining P38.94 sa triplicate copy.

Hangtod karon dili pa makahatag og kinatibuk-ang detalye si Camarillo kun pila ang kinatibuk-ang na-alkanse sa dakbayan sa maong pag-tamper.