Welgista sa Lapu' gibalhog sa karsel

Dose ka welgistang gidakop gibalhug na sa Lapu-Lapu City Jail kagahapon sa udto human ang piskalya mirekomendar nga pasakaan og kasong kalapasan sa Child Abuse ug kalapasan sa resistance and disobedience ngadto sa korte.

Matud pa ni Lapu-Lapu City Police Chief P/Supt. Louie Oppus nga wa siyay mahimo gawas sa pagtuman sa mando sa korte nga ibalhin na sa Lapu-Lapu City Jail ang 12 ka mga militanteng sakop sa Kilusan para sa Pambansang Demokratiko kun KPD nga ilang nasikop sa milabay'ng bulan atol sa usa ka protesta nga gihimo niini atubangan sa Shangrila Mactan.

Ang maong kamanduan gikan ni Lapu-Lapu City RTC 53 Hon. Judge Benedicto Cobarde human nga gipasaka ang kasong kalapasan sa RA 7610 kun Child Abuse diin adunay piyansa nga mokabat sa P80 mil ug ang kalapasan sa Art. 151 kun Resistance and Disobedience to a person or agent in authority.

Base sa resolusyon ni Fiscal Jesus Rodrigo Tagaan nga giaprobahan ni Lapu-Lapu City Prosecutor Evangeline Gicale nasutang dunay tulubagon ang mga dinakpan ilabi isip ehemplo sa kabataan. Usa sa mga gidakop mao ang 16 anyos nga batang lalaki. Ang grupo gipasanginlang namato nga nakaangol og duha ka polis.

Nasuta usab base sa certification sa barangay Mactan nga di sila mga residente sa barangay ug way kalabutan sa mga residente sa maong dapit sukwahi sa pangangkon nilang silay apektado sa demolisyon.