Sikyu gidakop kay tanom natumban

Gibalhog sa bilanggoan ang guwardiya sa giugmad nga Cebu International Convention Center tungod sa pagtamak sa tanom sa center-island sa dalan.

Ang gidakop mao si Ronilo Curbo, 40 anyos, kinsa nagtingkagol sa Centro Police Station sa dakbayan sa Mandaue.

Ang suspetsado nadakpan nila ni PO1 Jimmy Perdigon, PO1 Giovani Babao ug PO1 Roberto Miclat nga mga sakop sa Presinto 1 sa Centro Police Station sa maong dakbayan.

Sa nasayran sa Banat News gikan kang PO1 Perdigon nga ilang nasigpatan si Curbo nga milabang sa center-island sa atubangan sa CICC.

Higpit nga gidili ang pagpataka og labang sa center-island tungod sa mga mahalon nga mga misitas nga bag-o pang gitanom.

Dugang pa ni PO1 Perdigon nga wala sab makapresentar dayon og kompletong dokumento sa iyang armas si Curbo.

Ang suspetsado nga gikahinabi sa Banat News miingon nga gikan siya nga namainit sa usa ka tindahan sa maong lugar ug nakahukom sa paglabang aron madali sa pagbalik og bantay sa CICC.

Hinuon iyang gipanghimakak nga gituyo niya pagtamak ang mga tanom sa center island.