Gitiuna'g tudlo sa tulisan

Tudlo ray gigamit nga armas sa gipasanginlang tulisan niadtong Miyerkules sa gabii diha sa usa ka beach resort sa Barangay Pooc dakbayan sa Talisay.

Bisan og walay tinuod armas si Jeam Risuena alyas "Basyo" hingkod ang panuigon taga Sitio Sunrise sa maong barangay nadala gihapon niini ang motorola nga cell phone ni Cyril Dizon, 22-anyos, taga Sityo Ilang-ilang, Lagtang Talisay nga nagkantidad og P7,800.00.

Si SPO2 Noel Factores, desk officer sa kapolisan sa Talisay mibutyag kagahapon sa Banat News nga si Dizon uban sa iyang mga amiga. Kalit giduol ni Risuena ug miingon kini og "hold-up" dayon ti-on sa tudlo niini ngadto ni Dizon.

Tungod sa kahadlok ni Dizon wala kini molihok og dihang nakamatngon kini nga ang gition kaniya tudlo lang diay ni Risuena misuway unta kini sa pagsukol apan nailog gyud sa suspetsado gikan sa biktima ang nahisgutang butang.

Daling mibiya sa lugar si Risueno human niini og sakmit sa cell phone ni Dizon ug gipangita kini karon sa kapolisan sa Talisay.