Ex-convict nasikop sa buy-bust

Usa ka giingong inilang pusher og shabu sa Barili ug gikatahong ex-convict nasikop sa gipahigayong buy-bust operation kagahapon sa kapolisan sa lungsod.

Ang suspetsado misuway sa pag-ikyas sa mga polis nga misikop kaniya hinungdan nga nahitabo ang ginukdanay una masignit sa mga otoridad ang suspetsado.

Nagtingkagol diha sa Barili detention cell si Chequito Layam alyas "Amid" 44, taga Guibuangan kinsa nasakmitan og tulo ka paketeng shabu, usa ka kalibre .22 nga pusil nga dunay unom ka buhing bala.

Si Insp. Ricardo Nayne, hepe sa kapolisan sa Barili mibutyag kagahapon sa Banat News nga si Layam lakip sa ilang watchlist ug taud-taod na nila kining gipanid-an.

Si Layam giila usab kini nga isog diha sa ilang lugar tungod kay magpasalba kini sa iyang pusil.

Ang kapolisan adunay mga nadawat nga reklamo batok ni Layam tungod sa pagpamaligya niini og ginadiling drugas diha sa ilang lugar ug sa pagkamaldito usab sa suspetado.

Matud ni Nayne nga sa milabay'ng tulo ka buwan mibiya si Layam diha sa ilang lugar aron magpa-lie low apan bag-o lang mibalik kini og mipahigayon gihapon sa iyang ilegal nga kalihukan.

Sa gipahigayong buy-bust operation napalitan si Layam og usa ka paketeng shabu sa poseur buyer gamit ang P200 nga marked money ug laing duha ka pakete ang nasakmit sa posesyon sa suspetsado.

Misuway sa pagdagan si Layam pahilayo sa mga polis nga misikop kaniya apan natanggong kini tungod kay ang lugar aduna nay mga polis nga nag-atang.

Si Nayne midungag nga gipasakaan dayon nila og kasong pagpamaligya og ginadiling drugas ug illegal possession of firearms si Layam.