Sunog sa Lapu-Lapu kagahapon

Gibana-banang P700 mil ang danyos sa sunog nga nahitabo sa dalan BM Demataga, Poblacion dakbayan sa Lapu-Lapu City kagahapon sa hapon nga miresulta sa pagkaangol sa usa. Ang nasunog mao ang compound sa pamilyang Degamo nga nagsugod sa panimalay ni Broilo Degamo sa lawak sa ikaduhang andana.

Usa ka Ariel Degamo ang nasamdan human kini mahiagom og 2nd degree burn sa iyang mga paa sa dihang iyang giluwas sa iyang pag-umangkon.

Matud pa ni Degamo nga iyang nakita nga dako na kaayo ang kalayo sa ilang panimalay diin natulog ang iyang singko anyos nga pag-umangkon nga si Mark Perez hinungdan nga iya kining gisaka ug giluwas.

Tungod sa kakusog sa kalayo, diha na miagi sa atop si Degamo nga nagsugod na og init.

Matud pa ni Lapu-lapu City Fire Marshall F/CInsp. Recardo Cornelio ug SFO1 Atilano Berido, imbestigador sa kabomberohan nasayran nga mosubra sa napulo ka mga panimalay lakip ang usa ka apartment ang naugdaw ug lain usab nga danyos.

Dugang pa ni Berido nga gumikan sa kakaraan na sa mga panimalay nga gama sa kahoy maoy hinungdan sa dali nga pag-ulbo sa maong kayo diin naapektuhan usab ang ubang mga kasikbit nga panimalay.

Lakip sa nasunog mao ang pito ka apartment nga gipanag-iya ni Prodencio Igot diin upat ka door niini ang naugdaw samtang ang tulo partially burned usab.

Ang alarma nadawat alas 3:05 sa hapon ug gipaubos kini sa general alarm ug nakontrolar sulod sa tulo ka minutos.

Mitabang usab sa operasyon ang 505th rescue sa Philippine Air Force nga migamit sa ilang helicopter sa pagkuha og tubig sa dagat ug gibugwak ngadto sa mga panimalay.