Citom ok teargas ra ang dad-on

City Traffic Operation and Management (Citom) uyon sa tinguha ni Mayor Tomas Osmeña nga padalhon og teargas ang mga traffic enforcer niini inay armas isip pagpanalipod sa ilang kaugalingon kun ugaling atakehon sa mga drayber.

Si Arnel Tancinco, executive director sa Citom nga gikahinabi sa Banat News kagahapon miingon nga dugay na kini gi-plano sa maong board ug malaumon kini siya nga mahinayon ang maong tinguha sa mayor.

"Uyon ako, ug dawaton kun ugaling naa may ihatag ang siyudad sa Sugbo nganhi kanamo ilabi na sa giingon ni Mayor Osmeña," matud pa ni Tancinco.

Apan ang tanang sakop sa CITOM kinahanglan pagabansayon unsaon pagdala sa teargas, ug unsa ang advantages ug disadvantages niini.

Midugang siya nga ang tanang traffic enforcer dinhi sa siyudad sa Sugbo kamao sa basic martial arts tungod kay gibansay usab sila niining matanga sa pagdepensa sa ilang kaugalingon.

Iyang giklaro nga dili sila makahatag og standard weapon ngadto sa tanang traffic enforcer kun dili kini usab mag-agi og standard training sa maong ekipo kun ila na kining gamiton.

Kun kahinumduman miluwat og pamahayag si Osmeña nga teargas ang iyang i-isyo ngadto sa tanang traffic enforcer sa sakop sa CITOM tungod kay luwas kini nga gamiton ug layo kini sa peligro ilabi na sa mga sibilyan.

Matud pa ni Osmeña dili hasol gamiton ang teargas sukwahi sa armas nga mag-agi pa og daghang pagsukitsukit sama sa pag-asikaso sa mga kumpletong rekisitos niini.