Martinez talikdan na ni Mondigo

Talikdan na ni Bokal Joven Mondigo ang dugay na niyang alalay sa politika nga mao ang mga Martinezes sa ikaupat nga distrito sa lalawigan sa Sugbo.

Matud pa ni Mondigo nga nagmahay na siya sa kampo ni kanhi Kong. Celestino "Junie" Martinez Jr. nga dili na siya pahibaw-on sa mga politikanhong kalihukan sa distrito lakip na sa ilang lungsod sa Medellin.

Kini ang hinungdan nga nangita siya og laing alalay nga mao si Gob. Gwendolyn Garcia nga maoy ilang kaatbang sa niaging eleksiyon.

Si Mondigo giubanan ni Medellin Mayor Manreza Lim ug mga opisyal sa barangay Luy-a, Caputatan Norte ug Maharuhay sa pagpakigtagbo kang Garcia sa Kapitolyo kagahapon.

Si Lim ang personal nga ni-endosar kang Mondigo ngadto kang Garcia nga maoy ilang ituboy sa pagkamayor sunod eleksiyon.

Sa dihang nahimong mayor si Mondigo sa lungsod sa Medellin, si Lim ang iyang bise-mayor hangtud nga nahimong sakop sa hunta probinsiyal si Mondigo ug nahimo usab nga mayor si Lim hangtud karon.

Gipasabot ni Mondigo nga gidudahan siya sa kampo ni Martinez nga nakig-abin na sa kampo ni Garcia sa dihang nakabisita ang gobernador sa ilang lungsod human sa eleksiyon sa tuig 2004.

Matud pa ni Mondigo nga ang iyang pagsuporta sa gobernador alang lang unta sa hapsay nga pagpadagan sa ilang administrasyon ug walay labot ang politika.

Nakapasamot sa pagduda ni Mondigo nga wala nay salig si Martinez kaniya mao ang wala na pagpahibawo sa ilang mga kalihukan.

Dugang pa ni Mondigo nga usa man unta siya sa nakatampo sa 90 porsyento nga mayoriya ni Martinez sa pagka-gobernador sa niaging eleksiyon sa ikaupat nga distrito, angayan lang unta nga masayud siya sa ilang kalihukan sa politika.

Ang grupo ni Mondigo ug Lim gikatakda pa nga mohimo og pormal nga pagpahibawo sa ilang mga sakop sa lungsod sa Medellin human sa ilang pagpakigtagbo sa gobernador kagahapon.