Mga molupyo sa danger zone sa Buot-Taup ibalhin

Sobra sa usa ka gatus ka mga pamilya nga nagpuyo sa gikonsiderar nga danger zone daplin sa sapa girekomendar sa konseho sa bukirang barangay sa Buot Taup siyudad sa Sugbo nga pabalhinon og kapuy-an aron malikay sa umaabot nga kalamidad ilabi na sa baha sa mga panahon nga masinati ang mga pag-ulan-ulan.

Si Buot Taup barangay captain Rosalita Callino personal nga mitunol ngadto kang Mayor Tomas Osmeña sa City Hall kagahapon sa maong resolusyon sa barangay nga nagtinguha pag-relocate sa 167 ka pamilya nga anaa magpuyo daplin sa sapa.

Ang maong resolusyon nga giaprobahan sa konseho sa barangay niadtong Hulyo ning tuiga nag-awhag kang Osmeña nga mogahin og pundo aron ipalit og pribadong luna nga maoy himuong relocation site sa maong mga pamilya.

Gipadayag ni Callino dihang nahinabi sa Banat News nga daghan nang mga higayon nga nakasinati og mga pagbaha ang maong mga pamilya ug gani niadtong milabay'ng pipila ka bulan usa ka bata ang namatay sa maong dapit human kini maigo sa nahulog nga dakong bato gikan sa maong sapa.

Ang mga apektadong pamilya naggikan sa pito ka mga sitio sa barangay sama sa Sitio Pangpang, Lawod, Tabok-sapa, Proper Buot Taup, Laguna, Lawis ug Sitio Pangi.

Si Osmeña sa iyang bahin mihangop ug miuyon dayon sa maong resolusyon sa barangay ug mipasalig nga mohatag og gahin alang sa maong katuyoan.

Kini human nakakita na og upat ka hektaryas nga luna si Callino nga nahimutang sa Buot Taup proper nga maoy paliton sa siyudad ug himuong relocation site.

Pagkakaron gitakda pang pakigsabutan sa kapitan ang tag-iya niini kun pila ang kantidad sa maong luna.