Hubog nga BIN gisikop

Hubog nga sakop sa Barangay Intelligence Network (BIN) gisikop sa kapolisan human masuko nga wala pautanga og beer ug nanion hinuon og armas sa tindera kagahapon sa kaadlawon diha sa may ihawan sa Reclamation Area ning dakbayan sa Sugbo.

Ang gidakop sa kapolisan sa Mabolo Police Station human manion og tindera giilang si Danilo Cabaral, 27, nga taga Sto Niño Pasil ning dakbayan ug sakop sa Cebu Modern Abbatoir.

Ang gitionan og armas sa suspek mao si Aileen Sarda, 19, dalaga, tindera ug giapil pa sa pagtion sa armas ang hinigugma sa biktima nga si Alvin Alicante

Segun sa report sa kapolisan nianang pasado ala una sa kaadlawon ang biktima uban sa iyang hinigugma diha sa tindahan ug kalit miabot ang suspek giingong hubog sa ilimnong makahubog.

Matud pa mikuha kini og beer ug miingon nga ang iyang pabayron mao ang usa ka negosyante.

Sa dihang wala mosugot ang biktima nasuko hinuon ang suspek ug mikuha kini sa gidala nga armas dayon tion nila ni Sarda ug Alicante.

Gumikan sa kahadlok sa duha daling nangayo og tabang hangtod nga miabot ang laing kauban ni Cabaral nga BIN.

Nahitabo ang linayogay tali sa suspek ug sa kauban niini human wala mopatuo nga gibadlong hangtod nga nakabuto ang armas.

Ang kapolisan human makadawat sa maong report daling miresponde ug nasikop si Cabaral apan wala na ma-recover pa ang armas nga maoy iyang gigamit.

Ang hepe sa Criminal Intelligence and Investigation Branch nga si Supt. Pablo Labra atol sa pakighinabi sa Banat News kagahapon sa iyang buhatan miingon nga iyang imbestigahon si Cabaral kun nakahimo ba kini og kalapasan.

Kun mapamatud-an nga sad-an iya kining taktakon sa pagka sakop sa Barangay Intelligence Network.

Matud ni Labra nga siya maoy nagdestino ni Cabaral diha sa ihawan sa may reclamation area.

"Ako nang imbestigahon kay kun sad-an ako na siya tangtangon pagka-BIN ato man gani imbestigahon ang polis basta makahimo og kalapasan," asoy ni Labra.